जळगाव तालुका पोलिसांची मोठी कामगिरी; १० गुन्ह्यांची उकल, ५ अट्टल आरोपी जेरबंद, ४.३० लाखांचा मुद्देमाल जप्त !

प्रतिनिधी: जळगाव तालुका पोलीस स्टेशन हद्दीत वाढलेल्या घरफोडीच्या घटनांना आळा घालत पोलिसांनी मोठी कारवाई करत १० गुन्ह्यांची उकल केली आहे. या कारवाईत घरफोडी व वाहनचोरी करणाऱ्या टोळीतील ५ अट्टल आरोपींना अटक करण्यात आली असून त्यांच्याकडून ४ लाख ३० हजार रुपयांचा मुद्देमाल जप्त करण्यात आला आहे.

गेल्या काही दिवसांपासून बंद घरे हेरून रात्रीच्या वेळी घरफोडी करणाऱ्या टोळीमुळे नागरिकांमध्ये भीतीचे वातावरण निर्माण झाले होते. या पार्श्वभूमीवर पोलीस अधीक्षक श्रीकांत धिवरे यांच्या निर्देशानुसार जळगाव तालुका पोलीस स्टेशनचे पोलीस निरीक्षक शशिकांत पाटील यांनी विशेष तपास पथके तयार केली. गुप्त माहिती, तांत्रिक विश्लेषण आणि सीसीटीव्ही फुटेजच्या आधारे पोलिसांनी संशयितांचा माग काढून टोळीला जेरबंद केले.

अटक करण्यात आलेल्या आरोपींमध्ये गुरुजीत सिंग सुजानसिंग बावरी (टोळीचा मुख्य म्होरक्या), दीपक बापू पाटील, राजेश माणिक राठोड, सुमित संजय कोळी आणि महेश उर्फ संतोष भोई यांचा समावेश आहे. चौकशीदरम्यान आरोपींनी ९ घरफोडी आणि १ मोटारसायकल चोरी, असे एकूण १० गुन्ह्यांची कबुली दिली. आरोपींकडून घरफोडीतील २.३० लाख रुपयांचा ऐवज तसेच २ लाख रुपये किमतीच्या चार मोटारसायकली असा एकूण ४.३० लाख रुपयांचा मुद्देमाल हस्तगत करण्यात आला आहे.

या टोळीचा मुख्य आरोपी गुरुजीत सिंग बावरी हा रेकॉर्डवरील अट्टल गुन्हेगार असून त्याच्यावर एमआयडीसी पोलीस ठाण्यात ११, जिल्हापेठ पोलीस ठाण्यात १ आणि जळगाव तालुका पोलीस ठाण्यात १ असे एकूण १३ गंभीर गुन्हे दाखल आहेत. यापूर्वी त्याच्यावर एमपीडीए (MPDA) अंतर्गत कारवाई करून एक वर्ष नागपूर मध्यवर्ती कारागृहात स्थानबद्ध करण्यात आले होते. कारागृहातून सुटल्यानंतर त्याने पुन्हा घरफोडीचे सत्र सुरू केले होते.

विश्लेषण : ही कारवाई जळगाव तालुका पोलिसांसाठी महत्त्वाची मानली जात आहे. एका कारवाईत १० गुन्ह्यांची उकल झाल्याने अनेक प्रलंबित गुन्ह्यांचा तपास पूर्ण झाला असून नागरिकांमध्ये सुरक्षिततेची भावना निर्माण झाली आहे. तसेच तांत्रिक विश्लेषण, गुप्त माहिती आणि सीसीटीव्हीच्या प्रभावी वापरामुळे आधुनिक तपास पद्धतींची परिणामकारकता पुन्हा अधोरेखित झाली आहे. अट्टल गुन्हेगार पुन्हा गुन्हेगारीकडे वळत असल्याचेही या प्रकरणातून स्पष्ट झाले असून, अशा आरोपींवर सुटल्यानंतरही सातत्याने देखरेख ठेवण्याची गरज यानिमित्ताने समोर आली आहे.