२५–३० वर्षांपासून दुर्लक्षित ‘शंभर फुटी’ रस्ता; संतप्त नागरिकांचे उपमहापौर मनोज चौधरी यांना निवेदन.

जळगाव प्रतिनिधी : शहरातील रामानंद नगर घाट परिसरातील किसनराव नगर, गुलमोहर सोसायटी, डीगंबर सोसायटी आणि सुंदर मोती नगर या जोडणाऱ्या शंभर फुटी रस्त्याची अत्यंत दयनीय अवस्था झाल्याने नागरिकांनी उपमहापौर मनोज चौधरी यांना निवेदन देत काँक्रीट रस्ता तातडीने तयार करण्याची मागणी केली आहे. भास्कर लक्ष्मण पाटील यांच्या नेतृत्वाखाली सर्व कॉलनीतील नागरिकांनी एकत्र येत प्रशासनाच्या दुर्लक्षाविरोधात संताप व्यक्त केला.

निवेदनात नमूद केल्याप्रमाणे, गेल्या २५ ते ३० वर्षांपासून हा महत्त्वाचा रस्ता पूर्णपणे दुर्लक्षित आहे. दगड, खडी आणि खोल खड्ड्यांमुळे हा रस्ता अक्षरशः ‘मृत्यूचा सापळा’ ठरत असून नागरिकांना रोज जीव मुठीत धरून प्रवास करावा लागत आहे. रस्त्याची अवस्था इतकी खराब आहे की रिक्षाचालक सुद्धा या मार्गावर येण्यास टाळाटाळ करतात. त्यामुळे शालेय विद्यार्थी, महिला, आणि ज्येष्ठ नागरिकांना मोठा त्रास सहन करावा लागत आहे.

या भागात पथदिव्यांचा अभाव असल्याने रात्रीच्या वेळी परिस्थिती अधिक धोकादायक बनते. नुकतीच या रस्त्यावर एका महिलेच्या गळ्यातील चार tola सोन्याची पोत चोरट्याने हिसकावून नेल्याची घटना घडल्याने नागरिकांमध्ये भीतीचे वातावरण निर्माण झाले आहे. अंधार आणि निर्जन परिसरामुळे गुन्हेगारीला खतपाणी मिळत असल्याचा आरोप नागरिकांनी केला आहे.

नागरिकांनी प्रशासनावर तीव्र नाराजी व्यक्त करत, “आम्ही महानगरपालिकेच्या हद्दीत राहतो की ग्रामपंचायतीत, हेच समजत नाही. ग्रामीण भागातही सिमेंटचे चांगले रस्ते झाले आहेत, मात्र शहरात राहूनही आम्ही मूलभूत सुविधांपासून वंचित आहोत,” अशी खंत व्यक्त केली. लाखो रुपयांचा निधी उपलब्ध असूनही या प्रभागात रस्ते, गटारी आणि पथदिवे यासारख्या मूलभूत सुविधा पुरवल्या गेल्या नसल्याचा आरोपही करण्यात आला.

दरम्यान, नागरिकांच्या समस्या ऐकून उपमहापौर मनोज चौधरी यांनी संबंधित विभागाला तातडीने पाहणी करून आवश्यक ती कार्यवाही करण्याचे आश्वासन दिले असल्याची माहिती नागरिकांनी दिली. मात्र, आश्वासनांची पूर्तता करून प्रत्यक्षात काँक्रीट रस्ता तयार करण्यात यावा, अशी ठाम मागणी नागरिकांनी केली आहे.

या शंभर फुटी रस्त्याच्या दुरुस्तीचा प्रश्न तातडीने मार्गी लावला नाही, तर मोठा अपघात होण्याची शक्यता नाकारता येत नाही. त्यामुळे प्रशासनाने याकडे गांभीर्याने लक्ष देऊन नागरिकांना सुरक्षित आणि सुकर रस्ता उपलब्ध करून द्यावा, अशी अपेक्षा परिसरातील नागरिकांकडून व्यक्त होत आहे.