सामाजिक कार्याची राज्यस्तरीय दखल; जळगावच्या आशीष सपकाळे यांना ‘महाराष्ट्र रत्न पुरस्कार २०२६’
जळगाव प्रतिनिधी : सामाजिक बांधिलकी, संविधान मूल्यांचा प्रचार-प्रसार आणि जनहिताच्या प्रश्नांवर सातत्याने केलेल्या कार्याची राज्यस्तरावर दखल घेत जळगाव येथील सामाजिक कार्यकर्ते आशीष उत्तमराव सपकाळे यांना प्रतिष्ठेचा ‘राज्यस्तरीय महाराष्ट्र रत्न पुरस्कार २०२६’ प्रदान करण्यात आला. संविधान अमृत महोत्सवानिमित्त आयोजित विशेष कार्यक्रमात हा सन्मान देण्यात आला.
अहमदनगर जिल्ह्यातील संगमनेर येथे तेजस सेवा प्रतिष्ठान यांच्या वतीने आयोजित राज्यस्तरीय सोहळ्यात हा पुरस्कार प्रदान करण्यात आला. यावेळी राज्याचे महसूल मंत्री बाळासाहेब थोरात, आमदार सुधीर तांबे, डॉ. मुकुंद भरसकाके, संघराज रुपवते, आमदार डॉ. किरण लहामते यांच्यासह विविध क्षेत्रांतील मान्यवर उपस्थित होते.
आशीष सपकाळे यांनी सामाजिक जनजागृती, शैक्षणिक उपक्रम, संविधानिक मूल्यांचा प्रसार तसेच सर्वसामान्यांच्या प्रश्नांसाठी केलेल्या सातत्यपूर्ण प्रयत्नांमुळे समाजात वेगळी ओळख निर्माण केली आहे. विविध सामाजिक उपक्रमांद्वारे नागरिकांमध्ये जागरूकता निर्माण करण्यासाठी त्यांनी केलेल्या कामाची दखल घेत या पुरस्कारासाठी त्यांची निवड करण्यात आली.
विशेष म्हणजे, संविधान अमृत महोत्सवाच्या पार्श्वभूमीवर दिला जाणारा हा पुरस्कार केवळ वैयक्तिक सन्मान नसून समाजहितासाठी कार्य करणाऱ्या कार्यकर्त्यांच्या योगदानाची राज्यस्तरीय पोचपावती मानला जात आहे. जळगाव जिल्ह्यातील सामाजिक क्षेत्रासाठी ही अभिमानाची बाब असल्याची भावना अनेक मान्यवरांनी व्यक्त केली.
पुरस्कार स्वीकारल्यानंतर आशीष सपकाळे यांनी हा सन्मान जळगाव जिल्ह्यातील नागरिक, सहकारी कार्यकर्ते आणि समाज परिवर्तनासाठी कार्य करणाऱ्या सर्व घटकांना समर्पित असल्याचे सांगितले. भविष्यात सामाजिक, शैक्षणिक आणि जनकल्याणाच्या क्षेत्रात अधिक व्यापक पातळीवर काम करण्याचा निर्धारही त्यांनी व्यक्त केला.
दरम्यान, या पुरस्कारामुळे जळगावच्या सामाजिक क्षेत्रातील कार्याला राज्यस्तरावर नवी ओळख मिळाली असून विविध सामाजिक, राजकीय व शैक्षणिक क्षेत्रातील मान्यवरांनी सपकाळे यांचे अभिनंदन करून पुढील वाटचालीस शुभेच्छा दिल्या आहेत.
