जळगावात पत्नीने केला पतीचा गळा आवळून खून; कौटुंबिक त्रासातून टोकाचा निर्णय.

जळगाव (प्रतिनिधी) : जळगाव शहर पोलीस स्टेशन हद्दीत एक धक्कादायक खून प्रकरण उघडकीस आले असून, पत्नीनेच पतीचा गळा आवळून खून केल्याची कबुली दिल्याने परिसरात खळबळ उडाली आहे.

मिळालेल्या माहितीनुसार, मनीषा भारत पाटील (वय ४५) हिने तिचा पती भारत पाटील (वय ५०) याचा दोरीने गळा आवळून खून केला. ही घटना मंगळवारी रात्रीच्या  सुमारास त्यांच्या राहत्या घरी घडली आहे. घटनेनंतर सुरुवातीला नैसर्गिक मृत्यूचा संशय व्यक्त करण्यात येत होता, मात्र पोलिसांच्या तपासात सत्य समोर आले.

पोलिसांनी दिलेल्या माहितीनुसार, मयत भारत पाटील हा मद्यपानाच्या व्यसनाधीन होता. तसेच तो मोठ्या प्रमाणात कर्जबाजारी होता. यामुळे घरातील आर्थिक जबाबदारी पूर्णपणे पत्नी मनीषा पाटील यांच्यावर होती. सततच्या आर्थिक ताणतणावामुळे आणि कौटुंबिक वादामुळे त्या मानसिकदृष्ट्या त्रस्त झाल्या होत्या. अखेर या सततच्या त्रासाला कंटाळून त्यांनी टोकाचे पाऊल उचलत पतीचा खून केल्याची कबुली दिली.

दरम्यान, मृतदेहाचे शवविच्छेदन (पोस्टमॉर्टम) करण्यात आले असता, गळा आवळल्याने व श्वास गुदमरल्याने मृत्यू झाल्याचे स्पष्ट झाले आहे. या अहवालामुळे खूनाची खात्री पटली.

या प्रकरणी जळगाव शहर पोलिसांनी मनीषा पाटील यांना अटक केली असून त्यांच्याविरोधात संबंधित कलमांनुसार गुन्हा दाखल करण्यात आला आहे. पुढील तपास पोलीस अधिकाऱ्यांच्या मार्गदर्शनाखाली सुरू आहे.

या घटनेमुळे जळगाव शहरात एकच खळबळ उडाली असून, कौटुंबिक वाद आणि व्यसनाधीनतेमुळे घडणाऱ्या गुन्ह्यांबाबत पुन्हा एकदा चिंतेचे वातावरण निर्माण झाले आहे.