🔥 जळगाव जिल्ह्यात उष्णतेचा कहर; तापमान ४५.५°C वर, १४ मेपर्यंत ‘यलो अलर्ट’ कायम

जळगाव : सध्या संपूर्ण जळगाव जिल्हा प्रचंड उष्णतेच्या तडाख्यात सापडला असून सूर्य अक्षरशः आग ओकत आहे. सलग वाढणाऱ्या तापमानामुळे नागरिकांचे जनजीवन विस्कळीत झाले आहे. मंगळवार, १२ मे रोजी जळगाव शहरातील तापमान तब्बल ४५.५ अंश सेल्सिअस नोंदवण्यात आले असून, यंदाच्या उन्हाळ्यातील हे आतापर्यंतचे सर्वाधिक तापमान ठरले आहे. ही नोंद India Meteorological Department च्या ममुराबाद वेधशाळेत करण्यात आली आहे.

अत्यंत कडक उन्हामुळे दुपारच्या वेळेत रस्त्यांवर शुकशुकाट दिसून येत आहे. गरम वाऱ्याच्या झळा आणि अंगावर येणारी तीव्र उष्णता यामुळे नागरिक त्रस्त झाले आहेत. जसे की रस्त्यावर चालताना आजूबाजूला आग लागली असून त्याच्या झडा लागत आहे अशी जाणीव होत आहे. कामानिमित्त बाहेर पडणाऱ्या नागरिकांना या उष्णतेचा मोठा फटका बसत असून, उष्माघात (Heat Stroke) होण्याचा धोका देखील वाढला आहे. 

दरम्यान, हवामान विभागाने जळगाव जिल्ह्यासाठी १३ मेपर्यंत दिलेला ‘यलो अलर्ट’ आता वाढवून १४ मेपर्यंत कायम ठेवला आहे. याचा अर्थ पुढील दोन दिवस जिल्ह्यात उष्णतेची तीव्रता अधिकच जाणवणार आहे. प्रशासनाकडून नागरिकांना दुपारच्या वेळेत बाहेर न पडण्याचे आणि आवश्यक ती काळजी घेण्याचे आवाहन करण्यात आले आहे.

उन्हाळ्याच्या या तीव्र लाटेमुळे लहान मुले, वृद्ध नागरिक आणि आजारी व्यक्तींना विशेष त्रास सहन करावा लागत आहे. उष्णतेमुळे डोके दुखणे, मळमळ, चक्कर येणे, अशक्तपणा अशी लक्षणे मोठ्या प्रमाणावर दिसून येत आहेत.प्रतिकार शक्ती कमी असलेल्या नागरिकांनी उन्हात जाणे टाळावे असे आरोग्य विभागाने नागरिकांना सतर्क राहण्याचा इशारा दिला आहे.

तज्ज्ञांच्या मते, या दिवसांत शरीरातील पाण्याचे प्रमाण कमी होणे ही मोठी समस्या ठरत असून, त्यामुळे डिहायड्रेशन आणि उष्माघाताचा धोका वाढतो. त्यामुळे नागरिकांनी नियमितपणे पाणी पिणे, लिंबूपाणी, ताक किंवा ORS सारखे पेय घेणे, हलके व सैल कपडे परिधान करणे, तसेच डोक्यावर टोपी किंवा रुमाल वापरणे आवश्यक आहे. दुपारी १२ ते ४ या वेळेत शक्यतो बाहेर जाणे टाळावे, असा सल्लाही देण्यात आला आहे.

दरम्यान, गेल्या काही दिवसांपासून उष्णतेने हैराण झालेल्या जळगावकरांना आता पावसाची प्रतीक्षा लागली आहे. हवामान खात्याच्या अंदाजानुसार, २० मेनंतर जिल्ह्यात वळीव पावसाची शक्यता वर्तवण्यात आली आहे. त्यामुळे उष्णतेपासून काही प्रमाणात दिलासा मिळण्याची आशा व्यक्त केली जात आहे. मात्र, तोपर्यंत नागरिकांना या उष्णतेचा सामना करावा लागणार असून, सर्वांच्या नजरा आता आभाळाकडे लागल्या आहेत.

“उन्हापासून बचाव करा, स्वतःची आणि कुटुंबाची काळजी घ्या – सुरक्षित राहा.”