जळगाव प्रतिनिधी: बी.यू.एन. रायसोनी शाळेच्या “एक्सझुबेरेंट 2025” कार्यक्रमात नैसर्गिक प्रतिभेचा अद्भुत उत्सवजळगाव – सर्जनशीलता, संस्कृती आणि संघभावनेचा संगम असलेला बी.यू.एन. रायसोनी शाळेचा 12वा वार्षिक “एक्सझुबेरेंट” कार्यक्रम 24 डिसेंबर 2025 रोजी महाबळ येथील संभाजी राजे नाट्यगृहात अत्यंत उत्साहात साजरा करण्यात आला. हा कार्यक्रम विद्यार्थ्यांच्या कलात्मक, तांत्रिक आणि सामाजिक कौशल्यांचा उत्कृष्ट आविष्कार ठरला. कार्यक्रमाचे वैशिष्ट्य म्हणजे वृद्धाश्रमावर सादर झालेले प्रभावी नाट्यप्रदर्शन, ज्यामध्ये भारतीय संस्कृतीतील मूल्यांची जाणीव आणि आधुनिक समाजातील बदल यावर चिंतन मांडण्यात आले. समवेत, विद्यार्थ्यांच्या जन्मजात कौशल्यांचा शोध घेण्यासाठी घेतलेल्या “मल्टिपल इंटेलिजन्स टेस्ट” या उपक्रमाचे विशेष प्रातिनिधिक सादरीकरण करण्यात आले. हा उपक्रम जळगावातील इतर शाळांमध्ये अद्याप न अवलंबलेला शैक्षणिक प्रयोग असल्याने त्याने प्रेक्षकांचे लक्ष वेधले. कार्यक्रमादरम्यान शाळेचे अध्यक्ष श्री. शिरीषजी रायसोनी यांनी आपल्या अध्यक्षीय भाषणात विद्यार्थ्यांच्या सर्वांगीण विकासासाठी मानसशास्त्रीय समुपदेशनाचे महत्त्व अधोरेखित केले. “प्रत्येक पाल्याचा अंतर्गत गुण ओळखून त्याला योग्य दिशा दिल्यास तो नक्कीच
आयुष्याच्या उच्च शिखरावर पोहोचू शकतो,” असे त्यांनी सांगितले. शाळेच्या विद्यार्थ्यांनी सादर केलेल्या विविध नाटिका, गीते आणि नृत्यांनी संध्याकाळ संस्मरणीय बनवली. पर्यावरण संवर्धनाचा संदेश देण्यासाठी इलेक्ट्रॉनिक निमंत्रणांचा वापर आणि “कागद वाचवा, झाडे वाचवा, पृथ्वी वाचवा” ही थीम या कार्यक्रमाचे आणखी एक वैशिष्ट्य ठरले. कार्यक्रमाच्या शेवटी अध्यक्ष श्री. शिरीष रायसोनी व उपाध्यक्ष श्री. उमेद रायसोनी व इतर मान्यवर यांनी उत्कृष्ट विद्यार्थी व कलाकारांना गौरविणाऱ्या पारितोषिकांचे वितरण केले. सर्व उपस्थित विद्यार्थ्यांनी, पालकांनी व शिक्षकांनी या कार्यक्रमाचा अपार आनंद घेत, बी.यू.एन. रायसोनी शाळेच्या सर्जनशीलता व संघभावनेच्या परंपरेचा गौरवपूर्ण उत्सव साजरा केला.
